John 4

UJesu Ukhuluma Lomfazi WaseSamariya

1AbaFarisi bezwa ukuthi uJesu wayephumelela njalo esebhaphathiza abafundi abanengi kuloJohane, 2loba nje iqiniso liyikuthi kwakungasuye uJesu owayebhaphathiza, kodwa kubhaphathiza abafundi bakhe. 3Kwathi iNkosi isikuzwile lokho yasuka eJudiya yabuyela futhi eGalile.

4Manje kwakumele adabule eSamariya. 5Ngakho wafika emzini waseSamariya owawuthiwa yiSikhari, eduzane lesiqinti uJakhobe ayesinike indodana yakhe uJosefa. 6Umthombo kaJakhobe wawukhonapho. Kwasekusithi uJesu owayesediniwe ngohambo, wahlala phansi malungana lomthombo. Kwasekuzafika ihora lesithupha.

7Kwathi umfazi waseSamariya efika ukuzakukha amanzi uJesu wathi kuye, “Ake unginathise.” 8(Abafundi bakhe babeye emuzini ukuyathenga ukudla.)

9Umfazi waseSamariya wathi kuye, “UngumJuda, mina ngingumfazi waseSamariya. Pho ungacela kanjani ukuthi unathiswe yimi?” (Phela amaJuda kabahlangani lamaSamariya.)

10UJesu wamphendula wathi, “Aluba ubusazi isipho sikaNkulunkulu lokuthi ungubani lowo ocela ukuthi umnathise, ngabe umcelile wakupha amanzi okuphila.”

11Umfazi wathi, “Mnumzana, Wena kawulakho okokukhisa amanzi, futhi umthombo uyatshona. Ungawathatha ngaphi lawomanzi okuphila na?

12Wena umkhulu na kulobaba uJakhobe owasipha umthombo lo laye wanatha kuwo kanye lamadodana akhe lezimvu zakhe kanye lemihlambi?”

13UJesu waphendula wathi, “Wonke umuntu onatha amanzi la uzaphinda ome njalo, 14kodwa lowo onatha amanzi engiwaphayo kasoze abuye ome lanini. Ngempela amanzi engimnika wona azakuba yintombo yamanzi egelezela ekuphileni okungapheliyo.”

15Umfazi wathi kuye, “Mnumzana, ngipha lawomanzi ukuze ngingaphindi ngome, ngingabi ngilokhu ngisiza lapha ngizokukha amanzi.”

16Wamtshela owesifazana wathi, “Hamba uyobiza umkakho uze laye lapha.”

17Waphendula wathi, “Kangilandoda.” UJesu wathi kuye, “Uqondile nxa usithi kawulandoda. 18Iqiniso liyikuthi usube lamadoda amahlanu, futhi indoda le olayo khathesi kayisiyakho. Lokho okutshiloyo kuliqiniso.”

19Umfazi wathi, “Mnumzana, sengibona ukuthi ungumphrofethi. 20Okhokho bethu babekhonza phezu kwentaba le, kodwa lina abaJuda lithi indawo okumele sikhonzele kuyo iseJerusalema.”

21UJesu wathi, “Zwana kuhle, mama, siyeza isikhathi lapho elingezukumkhonza uBaba entabeni kumbe eJerusalema. 22Lina maSamariya likhonza elingakwaziyo; thina sikhonza lokho esikwaziyo, ngokuba insindiso ivela kubaJuda.

23Kodwa siyeza isikhathi, yebo manje sesifikile lapho abakhonzi beqiniso bezamkhonza uBaba ngomoya langeqiniso, ngoba yibo abakhonzi abanjalo uBaba abadingayo. 24UNkulunkulu ungumoya, labo abamkhonzayo bamele bamkhonze ngomoya langeqiniso.”

25Umfazi wathi, “Ngiyakwazi ukuthi uMesiya (othiwa nguKhristu) uyeza. Esefikile uzasichazela konke.”

26UJesu wasesithi, “Mina engikhuluma lawe nginguye.”

Abafundi Bahlangana Njalo LoJesu

27Ngalesosikhathi abafundi bakhe babuya, bamangala ukufumana uJesu ekhuluma lowesifazana. Kodwa kakho owabuzayo wathi, “Ufunani na?” kumbe athi, “Kungani ukhuluma laye owesifazana na?”

28Owesifazana watshiya isigubhu sakhe wabuyela emzini wakibo wathi ebantwini, 29“Wozani lizobona indoda engitshele konke esengake ngakwenza. Kambe angaba nguye yini uKhristu?”

30Baphuma emzini lowo baqonda kuye.

31Kusenzakala konke lokhu abafundi bakhe bamncenga bathi, “Rabi, ake udle ulutho.”

32Kodwa wathi kubo, “Ngilokudla engikudlayo elingakwaziyo lina.”

33Abafundi babuzana bathi, “Kambe ngabe ukhona omlethele ukudla na?”

34UJesu wathi, “Okwami ukudla yikwenza intando yalowo ongithumileyo lokuqedisisa umsebenzi wakhe. 35Kanti angithi lithi, ‘Kusele izinyanga ezine ukuthi kufike isikhathi sokuvuna? Ngithi vulani amehlo enu likhangele amasimu! Amabele aselungele ukuvunwa. 36Khathesi lokhu umvuni uvele usehle ezuza iholo lakhe, usebuthela amabele ekuphileni kwaphakade, ukuze umhlanyeli lomvuni bajabule ndawonye.

37Ngakho ilizwi elithi, ‘Omunye uyahlanyela, omunye avune’ liqinisile. 38Ngalithuma ukuyavuna lokho elingakusebenzelanga. Abanye bawenzile umsebenzi onzima, lina selivune umvuzo womsebenzi wabo.”

AmaSamariya Amanengi Ayakholwa

39AmaSamariya amanengi akulowo muzi akholwa kuye ngenxa yobufakazi bowesifazana owathi, “Ungitshele konke esengake ngakwenza.”

40Yikho amaSamariya esefike kuye amcela ukuthi ahlale labo, wasehlala izinsuku ezimbili. 41Ngenxa yamazwi akhe abanengi kulalokho baba ngamakholwa.

42Bathi kowesifazana, “Kasisakholwa kuphela ngenxa yalokho okutshiloyo; manje sesizizwele thina ngokwethu, ngakho sesisazi ukuthi umuntu lo ngeqiniso unguMsindisi womhlaba.”

UJesu Usilisa Indodana Yesikhulu

43Ngemva kwalezo zinsuku ezimbili uJesu wasuka waya eGalile. 44(Phela uJesu yena ngokwakhe wayetshilo ukuthi umphrofethi kalalo udumo elizweni lakibo.) 45Wathi efika eGalile, amaGalile amamukela ngokumthakazelela. Babekubonile konke lokho akwenzayo eJerusalema eDilini lePhasika, ngoba labo babekhona khonale.

46Wabuya njalo wethekelela eKhana laseGalile, lapho aguqula khona amanzi aba liwayini. Kwakukhona lapho isiphathamandla sasesikhosini esasigulelwa yindodana yaso eKhaphenawume. 47Kwathi indoda leyo isizwile ukuthi uJesu wayesefikile eGalile evela eJudiya yaya kuye yamncenga ukuthi eze azosilisa indodana yayo eyase ilengela ekufeni.

48UJesu wamtshela wathi, “Ngaphandle kokuthi lina bantu libone izibonakaliso ezididayo lezimangaliso kalisoze lafa lakholwa.”

49Sathi isiphathamandla sasesikhosini, “Mnumzana, woza umntanami engakafi.”

50UJesu waphendula wathi, “Usungahamba. Indodana yakho izaphila.” Indoda yalikholwa ilizwi likaJesu yahamba.

51Yathi ilokhu iseza isesendleleni izinceku zayo zayihlangabeza zayibikela ukuthi indodana yayo yayisiphila. 52Isibuzile ukuthi kwakuyisikhathi bani lapho indodana yayo yasila ngaso, zathi kuyo, “Umkhuhlane uyixolele izolo ngehora lesikhombisa.”

53Uyise wananzelela ukuthi leso sasiyiso kanye isikhathi uJesu atsho kuye ukuthi, “Indodana yakho izaphila.” Yikho yena kanye labendlu yakhe bonke bakholwa.

54Lo kwakungummangaliso wesibili uJesu awenzayo, esefikile eGalile evela eJudiya.